Isit nanm nou tèt anba
Tèt nou nan fant janm nou
Landrèt nou chita nan lanvè n
Paradi n chita nan lanfè n Blan fè n wè nwè
Blan fè n wè fènwè gran jounnen
Maladi n chita nan refè n Revè n se boul pè
Pye n fi n sèch nan vire won sou kadav


Nou mete tèt kale pou kale tèt nou
Nou mete je pete pou di n kale je n
Chèf ki tounen gang fè nou pran gang pou chèf
San rann nou kont nou rann kont san nou
San n pa f on bòt sistèm nan bat nou ak eskò tenis


Isit depi byen bonè twò ta bare n
Myèl nou amè
Syèl nou atè
Nan pete rèl fyèl nou pete
Kè nou rete vi nou ale
Nou lave men n siye atè
Nou aktè nan fi m nan
men bandi touye n
Bandi piye n


Nou esklav mache jis paske n te prete libète pye n Isit im nasyonal tounen chante mès mò
Lapolis pran plas G9 Jounen n chich
Nich nou chèch
Nwit nou saf Apokalips pran plas genèz
Nou plante dlo nou mouri swaf
Nou bay lavi dwèt li vomi san
Lè n pot lidè sou do n se nou k pran baf


Nou devan dèyè


•▪︎• Gathely D. Chery

Konsènan otè a

Gathely D. Chery fèt nan vil Okap, nan jounen ki te 09 Janvye 1997 la. L ap fè yon etid nan syans politik nan "Campus Henry Christophe de Limonade". Gathely se kominikatè, blogè, ki pibliye atik nan "Amabilite Magazine". Li se yonn nan redaktè "Quid Haiti" ak "COMACTU".