Tipoupouloup mwen,

Pou jounnen fèt ou sa , mwen pa kwè mwen t ap janm jwenn fòs ak kouraj kite jou sa janbe latèt labrindiswa san mwen pa ekri ou yon ti moso lèt kenn anmore sou latè beni poko janm sizle nan rèv. Tankou ou konnen li: plis zegwi mwa me pran chante anndan kokolòs tèt mwen , se plis bonnanj mwen anvi bobo kuis kouraj ou. Pyout pyout ! Epitou tank m ap panse ak ou se tank m ap renmen w plis pase m . Chak jou ki louvri nan pla men ladestine !

Tipoupouloup mwen, mwen anvi ekri ou nan lèt sa a tout sansasyon mo damou ki abite nan kè mwen pou ou, anplis tou mwen anvi desinen ak men goch mwen tout kalite rèv ki batize lespri mwen chak lè lannwit nwaye nan wonn je mwen. Jodi a si ou wè chak grenn mo nan paj lèt mwen sa a genyen yon ti koulè bonè k ap defile do pou do sou kò yo se paske prezans souri ou ban mwen souf pou mwen leve lank plim mwen prè dousè melodi lavi, e depilè sa a tandrès souri ou pa sipann klere tout patikil ki anndan vant mwen ankè. Anplis m ap fè ou konnen tou se chandèl souri ou ki sèvi m pòt vwa lajwa anba move tan lavi anmenmtan se li menm tou ki sèvi jou mwen yo kolòn vètebral tou. Anverite lè ou souri se tankou yon mèvèy ki pi klere pi sedwizan pase solèy Bondye . Pou jodi a mwen pran tout tan pou di ou yon bèl mèsi paske nan jou dezè mwen yo se prezans ou ki toujou sèvi m lonbray lè sezon sovaj anvi grizonnen mezi tèt mòn ki nan mwen. Aklè , mwen pran tout tan pou m di ou yon bèl mèsi ankò achak fwa m sonje se dlo kò kouraj ou ki konn sèvi rèv mwen yo sous dlo.

Tipoupouloup mwen , pou jounnen fèt ou sa mwen pa konn ki kantite bonbon cho pou mwen ta fè pòch van an kado. Kòmkidirè pou li ta kouwonnen ou kouwè yon ti kap an kè nan sezon vandredisen. Mwen gen lenpresyon tout reyon limyè ki genyen anvi sanble avèk souri ou . Anpitou se tandrès souri ou ki fè mwen konprann tan an gen de branch paradi : youn anwo nan syèl la kote Bondye sere zetwal li yo, lòt la a abite nan tranch souri ou kote bonnanj mwen fè ladesant rive maten midi o swa .Tout flè ki pouse pa bò isit pote etikèt non ou pou ka ranmase frechè sansasyon lavi genyen anba lanng li. Anverite bèl ti manman cheri mwen se pou rezon sa limyè souf ou abiye letènite delatètopye cheri.

Tipoupouloup mwen , pou jounnen fèt ou sa a ankò mwen swete tout sa je ou gade tounnen : yon grap flè choublak, yon grap fèy melis , yon grap fèy sitwonèl, ak yon grap fèy mant pou anbonmen jwisans lavi ou chak jou ki jou nan pla men tan an. Epi mwen swete ou ankò pou tout sa dwèt ou yo manyen tounen yon kanaval branch bwa gaya, yon kanaval palèt fèy figye nan lanvè kou landwat y a va sèvi ou repozwa achak sezon yo vin sovaj nan men ou. Epitou m swete pou pousyè pye ou tounnen poud cham letènite .

Pandan jounen fèt ou sa ankò , mwen swete ou leve fanm ou byen wo pou abiye brav ou menmjan ou konn abitye bat tenèb lè movezè grangou konn anvi noye kè m chak jou ki leve nan de pla men m . Anfèt mwen konseye ou ranmase fòs ak enèji ou yo pou ou kontinye konbat movezè lavi pou mwen ak ou cheri . Aklè , mwen vle ou konnen se ak très cheve ou yo fè kòn pou bèf. Kidonk leve kran ou wo pi wo pase limit syèl la pou ou pa kite tan an manje lespwa ou nan fèy bannann , fanm!

Nanpwen van ki pa fè tizè pou frechè bote , ki dirè pou mwen ki se fwi zantray ou . Alenstan prezan m prete tout kalte zengredyan imajinasyon atis penn, tout fòmil bote ki kreye Lasitadèl Laferyè, Basen Zim, Gwòt Marijàn, Fò Jak , etandòt ankò. Jouk pou lèt mwen sa sanble tipikmam avè w tankou de tak dlo k ap kalewès sou yon palèt fèy bwa siwèl . Anpi malgre tout chèlbètis plim mwen kopye nan imajinasyon powèt sireyalis yo, anverite pyès mo mwen yo pa sa rive dekri pwezi ak mizik ki nan langay kò w ni dekri pisans santiman m ki nan wonn kè mwen pou ou. Ayayay manman mwen! Lè w ap mache ou sanble tèt koupe ak yon powèm damou k ap pwomennen do touni nan van an. Se nan mak pye w pousyè latè benyen plis w ap mache se plis lespwa pouse . Kote ou pile tout reyon limyè lib, tout sezon vin vèt, tout flè woz anvi vin bo pye w. Cheri se nan pousyè pye w m aprann nyaj se makiyaj tan se ladan tou m aprann tout kalte koulè bonè : yon koulè lavi , yon koulè lespwa. Ou pa ta kwè sa! Kras pye w se angrè cheri .

Ti poupouloup mwen, m ap fè ou konnen lanmou m pou ou pa gen okenn defo w a t a di yon gwoup wòch galèt vag lanmè fin bobo ! Achak fwa plant santi bon yo pote lodè kò ou ale nan van an kòm pwovizyon pou sans mwen yo, mwen santi m ozanj tankou yon granpanpan jouk mwen santi yon ti frechè sansasyon paradi anbrase tout depatman ki sou kò m. Ti manman cheri mwen , menmsi tout fwa Jezi ta deside retounen sou latè , m ap fè ou konnen m p ap janm bouke adore tanp kò ou tankou lè ti zwazo devan glas . Depi m jwenn souf ou pou lave peche m yo , zafè pou lanfè ti Jezi ! Nan paj lèt mwen sa si ou wè mwen dezabiye kè mwen ak tout santiman ki ladan se paske mwen santi se sèl fason pou mwen fè ou konnen nan ki dimansyon lanmou mwen renmen ou sòti nan tèt rive nan pye. Ou pa ta kwè mwen ti cheri! Mwen renmen ou jouk nan fondas kalite ou yo rive nan rasin defo ou yo .

Ti chètout mwen, mwen vle ou konnen lanmou mwen genyen pou ou p ap janmè chanje katye menmsi dezagreman lavi ta vle toupiziye wonn kè m nan tout jwenti nan kò l . Ti cheri sonje m renmen ou lanvè kou landwat , kote m pase m ap toujou renmen ou alafoli, nan bon tan kou move tan m ap toujou bat bravo pou bote ou , souri ou tankou lè solèy ap kouche dèyè yon ti touf nyaj tou fre. Menmke apokalis ta fè nich sou kò m sèlman se nan pye lonbray ou m ap vin mouri paske lè mwen bò kote w mouri bèl . Ou pa ta kwè sa cheri! Pou janm renmen ou mwen prè pou m likide yon zing nan souf mwen anplis rebati yon dezyèm syèl pi klere pi chèlbè pase yon ti ponyen limyè koukouy k ap kalewès nan mitan kè vil pòtoprens. Mwen vle ou konnen ankò , mwen pa bezwen kouchdè ni branch limyè pou m respire ankò. Kidonk mwen vin aprann viv san yo toukòm timoun nan lari yo aprann viv san dra, san rèv. Aprezan se orezon prezans ou ki tounen m bwat oksijèn .Ou pa ta kwè sa ti cheri! Epi m kwè se rezon sa ki fè sans mwen yo ap priye ou an gras pou ou souri pi dri pi fon pou yo kab respire pi dri pi chèlbè.

Mwen pa jwenn ni kijan ki kouman pou m fini dènye paj lèt mwen sa a , men m sèten tout sa mwen anvi di ou se pran santiman mwen genyen pou ou yo tanpri bobo yo jouk nan fonnanm kè yo anmenmtan fè yo sèvi ou frechè pou lonbray ou achak lè zegwi revèy anvi dezakòde nan bra w . Mwen vle fè ou konnen ankò lanmou m gen pou ou se pi bèl paj fondèt dousè pou timoun aprann reve je klè plezi ki gen nan chak koulè lakansyèl. Anfèt, mwen pa jwenn mo nan vwa m ankò pou m kab fè w santi nan ki vitès kè mwen ap bat tanbou pou ou sèlman ti cheri . Mwen sèten m pa t ap janmè fini dènye paj lèt mwen sa a san mwen pa fè aprann lèz souri ou se pi bèl reyon limyè linivè genyen kòm dekorasyon pou lavi.

Tipoupoupouloup mwen, anvan m di ou orevwa, mwen anvi mete tout limyè zetwal nan cheve ou yo tankou kolye kouwòn anmenmtan m anvi chante pou ou tankou lè Wosinyòl ap chante pou kowosòl jouk vwa mwen rive ranmase tout bèl nòt mizik bonè genyen nan galata l. Alafen pou jounnen fèt ou sa a, mwen anvi danse tout bèl nòt mizik klasik Moza, Aydenn , Bitovenn konpoze pou selebre lavi . Alaverite mwen anvi danse pou ou tankou lè ti zwazo ap danse pou grenn figye anba yon ti solèy tou cho konsa m a va rive pentire jou fèt ou sa a. Achak jès achak pa ! Anvan lannwit sonnen dingdendong mwen vle ou konnen pou yon dènye fwa ankò se sou ou sèlman rèv mwen yo apiye ti cheri. Chak jou ki louvri nan pla men ladestine .
Bòn fèt manman cheri m, sonje kè m renmen w plis pase m.


Mendiny Joseph
L'Art-Rime