Jodi a se ak anpil lonè respè pou m pentire mo m yo ak lajwa vlope yo nan papye kado pou m depoze yo youn pa youn nan bwat souvni w. Yon ponyen lanmou pou ou Timadanm!

Mwen santi yon souri tounèf dekachte sou vizaj mwen. Sous lajwa pete nan fon kè m,lè mwen wè m rantre nan jaden lespwa pou m al keyi mo k ap fè w viv pi lontan.

Manman, mwen konnen kè ou pa kontan. Lè ou wè tan an ap kouri epi w ret kanpe kon ti estati ki nan repozwa kay gwo zotobre a babin. Ou toujou renmen itilize tan an. Men, ou mèt bwè dlo reziyasyon an tande. Paske se tout mond lan ki ajenou nan solèy sou graj pandemi kowona viris la.

Mwen sonje lè m te tikatkat, touzoulout pa t menm ko di : "rat rat rat menm voye yon bèl ti dan ba ou, pou w voye yon vye vye dan ban mwen". Se ou menm mwen toujou wè, Lendi, Madi, Mèkredi, Jedi, vandredi, Samdi, Dimanch k ap pouse bourèt lavi m maten midi swa san pran souf. Ou pa konn solèy cho, ou pa konn lapli.

Chak jou bondje foure nan almanak legzistans. W al estasyone w bò lari a nan pousyè a ak yon gode 6, yon manit, yon plat bè,yon zegwi, kèk fil pit , kèk grenn sak. Se yo ki sèvi w kòm zam. Ak yo, ou pa bay leta regle anyen. Se ak yo menm ou voye m al ranmase ti moso lakonesans. Ou renmenm menm jan ak yo. Mwen renmen w menm jan ak yo.

Manman, ou se yon powèm k ap rete grave nan memwa letènite. M toujou anvi konn konbyen santimèt souri mezire. Vwazinaj toujou ap di se kabrit tomazo nou ye.

Nan ou tout manman ta dwe peche tikal bonte.

Mwen si tèlman renmen w. Mwen envante yon bèl ti dous pou ou "Tchandolye" Mo sa a vle di "Renmen san kite rès" se pou ou menm mwen kreye l. Mwen bouke peche mo bò pye sen valanten pou m di w janm renmen w. Manman cheri. M pran san m, m pran tan m. Pou m ekri ti lèt sa a pou ou kote chak mo nan lèt la pral chante kou wosinyòl pou di w byen rekòlte kafe Manman. Mwen rete kwè ke w ap nan vwayaje nan gout mo m yo k ap bay payèt lakontantman.





Grégory Florestal