Jounen yo pa janm vini pou kont yo. Yo toujou mache men nan men ak yon makòn sousi. Devwa ki pou remèt. Lajan kay oswa lekòl ki pou bay. Yon relasyon ki kraze. Ensekirite k ap paweze. Tout bagay sa yo ak yon pakèt lòt ankò mete nou nan sitiyasyon enkòfòtab. Yo aji ni sou kò nou ni sou lespri. Sitiyasyon enkonfò sila a, ekspè yo rele l "Stress". Men senk bagay ou ka fè lè w estrese.

1- Espò

Aktivite fizik tankou mache, kouri, jwe foutbòl, ale nan djim, sote kòd, elt bon ni pou kò ni pou lespri. Aktivite sila yo ede kò a sekrete yon seri òmòn tankou serotonin, dopamin ak andòfin ki bay yon santiman byennèt. Anplis aktivite fizik yo pèmèt ou bliye sousi lavi pou yon ti moman sa ki pa rete san konsekans sou eta mantal nou. Kèk minit espò chak jou se youn nan pi gwo remèd ki egziste.

2- Planifye

Yon ajannda se yon ti dokiman ki ede w mete lòd nan aktivite w, jere jounen w ak lavi w pi byen. Tank aktivite w yo ap monte youn sou lòt se tank nivo estrès ou ap ogmante. Poudayè, anpil etid demontre nivo estrès la miltipliye lè endividi a pèdi kontwòl aktivite l yo. Se poutèt sa a li toujou bon pou w gen yon ajannda epi itilize l regilyèman.

3- Sòti

Anpil fwa koze estrès la konn bay parès ak sansasyon fatig. Moun ki nan sitiyasyon sa yo konn gen tandans rete pou kont yo, pa pale ak pèsòn. Konpòtman sa yo se pwazon. Moman ou plis estrese se moman pou w sòti, pale ak moun, vizite kèk espas ou renmen oswa ou te toujou swete vizite. Anplis, ou pa dwe pè pale de sa w santi a ak antouraj ou. Si w santi w estrese, fèmen anndan kay se pa solisyon an.

4- Li

Montesquieu, yon ekriven fransè, fè konnen pa gen okenn chagren lekti pa efase. Li yon liv ou renmen se youn nan pi bon remèd ki genyen kont estrès. Nonsèlman li se yon vwayaj men tou li ede w retire fokis la sou pwoblèm ki jème estrès lakay ou a. Alòs pa ezite kenbe liv ou nan moman w santi w estrese yo.

5- Jwe

Lide ki fè kwè granmoun pa jwe a se yon move lide. Lè w santi w estrese, ou mèt sèlman rale katalòg anfans ou, pran kèk nan ti jwèt yo, fè yo. Tamtambe, manman m te gen yon ti chat, lago kache, kont ak pla men cho se kèk ladan yo. Eseye taktik sa a lè w estrese pou w ka relakse w.