Si w te kanpe, chita! Malaba pitit plim vin rakonte n yon istwa ki va louvri je n sou kòman eleksyon fèt nan peyi nou. Piblikasyon sila antre nan ribrik "Kreyòl nou ye". Ribrik sa ap kontinye pandan tout mwa oktòb la. Ann li.

Se pa de twa payèt lespri m pa bay nan dans douvanjou, anvan m resi rive depoze lapat sou yon bann mo wòdpòte ki t ap defile nan terasman lavi. Mwen kole tout vèb ak vokabilè ki anndan vant lodyans lan ak lèt kandelam pou yo ka kanpe tennfas san pwennfepa pou fredone chan revolisyon sou batman kè nou chak.

Depi lè m te konn ap kouri pye atè san kanson nan jwèt lago kache. M tande Depite, Senatè, Prezidan ap pale de eleksyon demokratik nan radyo. Sa fè tout lajounen tout lannuit mo sa a pran valkande bay kalinda jwe jon nan tout kafou ki andedan kòkòlòs tèt mwen.

Lè m koumanse ap keyi grap bon konprann pa bann ak pakèt nan jaden lakonesans. Mwen wè aklè se eleksyon tèt bòchèt, eleksyon machòkèt, eleksyon tèt gridap, eleksyon aloufa, eleksyon madigra, eleksyon pèpè, eleksyon grenn senk, eleksyon danrachòt...

Bon, kite m rakonte nou yon istwa ki pase tou avanyè la a. Lè sa a m te apèn gen diswit rekòt kafe sou zo bwa tèt mwen.

Nou wè eleksyon sa m pral pale nou de li a la a. Li te chaje ak kandida. Kandida fè mikalaw kouwè lè bann rara latibonit pral kase fèy jou vandredi sen. Si memwa m pa fè m defo m ap sonje te genyen 54 kandida alaprezidans.

Nan moman kanpay la, pawòl kandida sikile nan zòrèy tankou boul malatchong. Pawòl sipotadin, pawòl siwolin, pawòl soulay, pawòl van, pawòl kann, pawòl dous pou chavire bonnèt. Depi jounen an louvri pye l byen laj bay solèy rantre nan fouk li, se konsa sa ye!


M p ap kache di nou sa. M ap dòmi mwen wè m ap vote. Lè je m kale, m pa mande pèsonn ki boul rèv sila a bay nan tchala. Pou yo pa mande m ki kandida m te wè m ap vote nan rèv la. Paske grenn vòt mwen chita nan fon kè m.

Ebyen nan jou vòt la. Mwen leve byen bonè, bajou pa t menm ko kase. M pike monte m al estasyone m nan tèt fò lakrètapyèwo. M ap kontanple latibonit k ap dodomeya nan pye mòn nan. Se te yon gwo jou dimanch syèl te gentan louvri 2 bra l pou l ranmase priyè pote bay bondje.
An apre, mwen vin sonje m pral vote. M kouri sou pwent pye tankou lè timoun ap fè jwèt alarive. M kouri, m kouri jouk m rive lakay mwen. M pran dlo m benyen, m met ti rad mwen sou mwen. M fre kon kola15. M foure kat elektoral mwen nan bouda pòch mwen epi m plonje pou sant vòt" Madame Pajot" se la non m soti. M pa konn nan ki biwo sèlman.

Fò m di nou sa, tout nan wout la, m ap plede kwaze ak bèl ti grenn fanm kreyòl k ap fè m je dou. Kòm tout janm vire kè m mwen wè Rozi Flè Kayimit parèt. M oblije mawozo.

Lè m rive. Mwen wè lakou a kaye ak moun. Malgre chalè lakontantman ap kwit chagren nan kè m. M pa fè tèt cho. M pran san m pou m gade nan ki biwo non m afiche. Mwen wè se nan biwo 8. M pase menm nan vizaj mwen epi m rantre anndan biwo a pou m al vote.

Lè m rantre mwen wè yon ti gwoup moun isit, yon ti ponyen moun laba ap ranpli bilten met nan bwat. M sezi, m tranble kou fèy bwa van vante. M pa rache yon mo voye nan kòlèt mesyedam yo. M soti san bri san kont m al chita anba yon gwo pyebwa nan k ap simaye frechè sou tout kò lakou a , pou m ka poze tèt mwen dezoutwa kesyon. Kilè n ap kwape koripsyon? Kisa k nan tèt dirijan nou yo menm? Pouki nou krache sou efò zansèt nou yo? M tèlman sezi dlo je m monte otè katredal.

Nan detan twa mouvman gen yon gwo nèg ki pòtre wobo k fabrike nan peyi Japon ki parèt sou mwen.

_ Sa k gen la a, piti!
_ Poze wi
_Ou vote deja?
_Non!
_Kot kat elektoral ou?
_Li nan pòch mwen!
_Ou konn sa w ap fè pou la a!
_ M pa konnen non!
_ M ap ba w 1000 goud, pou w al vote yon kandida nan sant vòt" Lycée Henry Christophe" pou mwen.

San lakrentif. M di misye san sal, tèt flit, ou pa al bay papa w li. Misye fache. Li fè sa pou l kouri sou mwen. M pase menm atè m pran 2 biswit leta. Pou m fann tèt li.

Chans pa l. Gen 4 grandèt ki sanble ak ansyen choukèt lawouze sou tan makout ki vin kenbe m. Yo pale ak mwen. M poze.

Misye bat lestomak li sèt fwa pou l di ooo bagay m fè la a se bagay pou m mouri. M tou di l konsa , m prè pou m travèse fontyè peyi san chapo ak diyite m kenbe anba bra m.