Grégory FORESTAL ki gen pou non plim li Malaba pitit plim fèt nan plamen sen valanten nan lanne 1996 nan Depatman latibonit espesyalman nan komin tirivyè. Li se komedyen, Dizè, Kontè, powèt. Li se tou kowòdonatè MAS (Mouvman Atis Solid) pou komin Tirivyè. Tèt lalin cho se premye liv li pibliye. Men 5 liv, 5 liv ki ekri nan lang tout ayisyen, otè a panse tout tizè lekti ta dwe li rapid rapid.
Tigri
Nan plede chire moso lekti m al sote sou Tigri nan chimen lespri. Depi lè a Tigri fè m wè mezi kras reyalite n k ap pase nan televizyon legzistans.
Nan bidonvil jalouzi
nan petyonvil
Tout lonbraj gen dan doukla
Lamizè pentire tout koulè
Si nou kwè mwen manti
Al gade n a wè jan lavi tchwipe
timoun yo nan retwovizè li
Se poutèt sa. Mwen vin envite nou pou n al fè kòkòday ak Tigri. Lè nou fini n a pote rezon m ban mwen san plenyen.
Tigri ( kont)
Otè: Jacques Adler jean Pierre
Doub fas lanmou
Doub fas lanmou s on woman plengrennen. Chapit yo makònen ak yon seri reyalite n ap viv toulejou. Chak mwen li Doub fas lanmou yon souri tou nèf dekachte sou vizaj mwen. Al li Doub fas lanmou zanmitay ou p ap regrèt.
Doub fas lanmou ( woman)
Otè: Guten Rachad jean baptiste
Gout lank
Mesyedam yo valkande je yo nan kat kwen lari pou ranmase rèl nou al lage douvan sèlpòt larepiblik.
Nan kat kwen lari
Pòv yo chita
Y ap niche kwiy yo
Nan Gout lank mo yo mache san poze. Mo yo swe. Mwen menm chak jou bondje mete nan almanak lavi, m li Gout lank. Mesyedam lasosyete Gout lank se yon chedèv .
Gout lank ( pwezi)
Otè: André Miracklin
Otè: Lorvelie Milfleur
Pwomès
M kenbe pwomès mwen lajounen. M kenbe l tou lè solèy ap wonfle anba dra lannuit. Mwen apante pwomès byen apante ak je m. M wè mo yo ap jwe jon, bay kalinda. Lari yo menm layite tout kò yo andedan paj liv la. Zanmitay kite m ba w yon ti konsèy : Kenbe pwomès ou tande !
Pwomès ( pwezi)
Otè: Lyonel Trouillot
Tèt lalin nan cho
Yon bann mo wòdpòte lakansyèl ponn. Malaba pran san l, li pran tan l. Li ranmase mo sa yo, youn pa youn pou fè Tèt lalin cho.
Chak lè je m tonbe anwo w
Bote w efase tout pwoblèm ki nan panse m
Si m te kokobe
Bote w t ap fè m leve kanpe sou de pye m
Anndan Tèt lalin cho mo yo mache san pantalèt pou lemante lektè. M pa kache di nou mesyedam. M kidnape pi fò nan yo. Si m te nou menm, m t ap mache pi prese al gade kouman tèt lalin cho.
Tèt lalin cho ( pwezi)
Otè: Grégory FORESTAL ( Malaba pitit plim)
14 Commentaires
Riguet Aneus
January 08, 2020 - 01:57:20 AMFélicitations à ce jeune talent rivartibonitien .Tiens toi ferme le monde rivartibonitien/haïtien et le monde attend beaucoup plus de toi mon frère.
DARELUS Enel
January 08, 2020 - 03:21:43 AMBon travay zanmerant
Malaba pitit plim
January 08, 2020 - 10:50:53 PMEwa tout zanmitay
Malaba pitit plim
January 08, 2020 - 10:50:56 PMEwa tout zanmitay
Aliantus Rachelle
January 08, 2020 - 11:52:29 PMBon travail mon frère
Jeanken
January 09, 2020 - 11:46:15 AMBon travay Malaba Pitit plim
Malaba pitit plim
January 09, 2020 - 10:57:13 PMEwa zanmitay mwen yo
Jacques Ezechiel
January 10, 2020 - 11:59:15 AMSe byen tokay !!!!????????????
Orisme wilguens
January 11, 2020 - 10:15:05 AMOk malaba.bon travay
Malaba pitit plim
January 11, 2020 - 05:41:49 PMEwa zanmitay mwen yo
Kònichon
February 03, 2020 - 03:27:07 AMLimyè pou tout nèg
Baky omnipotent
February 04, 2020 - 12:09:33 PMBon travay Malaba
Beni509
February 05, 2020 - 12:42:53 PMKenbe la Bro????????
Malaba pitit plim
February 08, 2020 - 12:41:13 AMEwa zanmitay mwen yo