Se depi m tou piti m tande y ap di "Tou manti pa fon". Men eksperyans montre m gen manti ki pi mal pase ja. Ou ka pi gwo eksploratè sou latè, ou fè vi w ap chache l ou pa jwenn li. Se pa grann Lamèsi k ap vin demanti pawòl sa a. Poudayè se de li mwen vin pale nou la. Grann Lamèsi se manman nèf pitit ki vivan. Li te gen senk lòt ki pa te rive depase laj twa mwa. Yo te manje yo. Se pa yo, men pito sò Mikalin, gran sè li bò kot papa ki te kuit ti lèzanj yo daprè sa li pa janm rate yon okazyon pou li rakonte. Li menm ak sè li sa a pa t mare kabrit yo menm kote. Bòs Janil, papa l pa t okipe Mikalin. Li te fè l ak yon dam okap ki te vin travay kay yon ansyen depite nan Kafou. Se la yo te kwaze. Bòs la te zanmi domino depite a. Se sou tab domino a menm li te lage Mika nan kannkès malerèz la. Tou piti, Mika te pwomèt tèt li pou l vanje manman l. Pi bon fason li te jwenn pou l fè sa a, se manje pitit ti sè li yo, Lamèsi. Aprè lanmò twazyèm timoun nan, grann te mete pye li nan dlo pou l konnen sa k ap pase. Nonsèlman, li bay Mika baboukèt, men tou li te fè yon ekspedisyon milèt dèyè l, sa ki fè jouk li ale nan peyi san chapo li pa t janm manke ansent.


Gwo bri kouri sou katye a se grann Lamèsi ki manje Djori. Yon bèl ti bebe, men gwosè. Manman l sè Jinèt leve jwenn li mouri. Evènman sa a te lage zòn nan nan anpil tristès. Pèsòn pa janm konnen ki moun ki te voye premye kout wòch la. Ki premye moun ki te avanse tèz grann kòm moun ki manje tchovi a. Gen moun ki di se paske se li ki manje ti pitit la ki fè l pa kriye. Gen lòt ki di yo te konn wè alamaskay nan kwen kay dam nan. Fifi menm di se pou jalouzi ki fè l manje bebe a paske gen youn nan pitit fi li yo ki te ak Djeri, papa pitit la. Chak moun ap bay vèsyon pa yo. Grann te oblije kite zòn nan pandan yon bon tan paske l pa t ka sipòte kout twaze vwazinaj la. Youn nan bagay ki te pi rèd se lè l ap pase pou tout vwazinaj ap rale timoun yo anba vant yo. Grann te vin tounen zo ak po tèlman l reflechi.

Finalman mwen te vin konn ki mò ki touye lanperè. Mwen te vin gen verite a sou de ti chèz. Sa nou kwè ki te rive. Mezanmi o, gen pawòl tande, se bouch ki pa genyen. Moun yo fè granmoun nan pase pou lougawou, podyab grann. Antouka, men pawòl la. Se chat kay ki manje pay kay. Se Djeri ki touye ti bebe a.

Yon zanmi Djeri fè l konnen li aprann madanm li sè Jinèt konn fè jwèt manman ak papa ak prezidan Djak legliz la, frè Masèl. Menm kote misye tande nouvèl la li wè bebe a sanble tankou de gout dlo ak djak la. Konsa a, misye te leve nan mitan nuit, li blese dwèt pous li ak yon zegui epi mete l nan bouch ti bebe a. Sa w tande a Djori kadav e grann Lamèsi pote vaz la.