Christopher Pierre ap viv Kafou. Li se moun Jeremi, depatman grandans peyi Dayiti. Etidyan nan kominikasyon sosyal la se premye responsab bibliyotèk "Les amis du livre".

Nan fen ane 2024 la, otè a pibliye premye rekèy pwezi li ki rele: "Lapèsòn".

Nan ribrik sa ki parèt chak dimanch, Gabynho boukante lapawòl ak powèt la sou dènye piblikasyon li a, pakou li, kwazman l ak literati...

Gabynho: Ou fèk sot pibliye " Lapèsòn, kay Edisyon "Flèche Rose". Kisa ki kache nan rekèy sila a?

Christopher Pierre: Lapèsòn se yon eksperyans, yon temwanyaj sou tout sa m pote nan fon kè m. Kit li se lanmou pou peyi m, pou pwoch Mwen, pou lavi. Kit li se èn ak fristrasyon, anvi viv ak desepsyon ki tanpe egzistans mwen. Lapèsòn pote tout.

G: "Lapèsòn", poukisa yon tit konsa a?

CP: M chwazi tit sa non sèlman parapò ak diferan reyalite li charye dèyèl. Men tou, paske m te vle kenbe vivan yon Moun ki te pase nan vi m ki kite tras li. E Lapèsòn se non sa m te ba li pote. Donk, ou ka konprann tou Lapèsòn se yon ochan.

G: Sa fè yon bon bout tan w ap fè pwomoyon literati nan kominote w, Tisous, nan Kafou. Di nou non, kilè, kibò, kòman ou kwaze ak literati.

CP: Se depi sou ban lekòl ( Lycée Louis Joseph Janvier) nan klas twazyèm m te komanse koutize literati, lanmou an pra l fè tij nan bibliyotèk Justin Lherisson ( BJL). Epi li donnen diran lòt pakou m yo.

G: Nou ka mete nou dakò, yon ekriven se pa yon loray kale. Se (ka) rezilta yon pakou, yon seri rankont... kijan, oumenm, ou fè vin ekriven-powèt?

CP: M pa rete kwè sa w di yo sifi sèlman pou yon Moun ekriven. Mwen ka di m se powèt parapò ak angajman e kalite pwezi m fè a. Men, m pa konsidere m kòm yon ekriven ki reponn ak tout egzijans yo. Si m chita sou sa k defini yon moun kòm ekriven. Se tout yon karyè ki k fè sa. Jiskaprezan, m se otè yon liv Pwezi. Men, m ap travay pou m devni ekriven m sweten a.

G: Yon ekriven pa ekri pou tèt li, dimwens pa pou tèt li sèlman. Li bezwen yon piblik. Yon seri lektè ki pou li zèv li. Ekriven an tou pa ekri pou anyen. Li gen yon bagay li vle/dwe di. Nan sans sa a pou kilès e pou kisa ou ekri?

CP: Mwen ekri pou tout tizè menm jan avè m. M di tizè se paske m Konnen chimen m pran an ( ekri Pwezi nan lang manman), pa yon chimen ki fasil e pa gen anpil moun ki renmen pwezi. Yo souvan banalize l. Nan sans sa, m ekri pou sila a yo ki renmen pwezi e ki kwè li ka met limyè sou lavi. Lòt rezon, se paske m kwè se youn nan meyè fason m ka angaje m pou byennèt kominote m. E pa gen pi bèl mwayen yon moun k santi l moun tout bon ke lè l angaje l, lè l dakò patisipe nan lavi sosyete a. Donk, m ekri pou m angaje m, pandan m ap reyalize pwop tèt mwen.